Ek Din Achanak Part 9

Episode 3

12th to pass ho gayi jaise taise lekin college mein admission lena kisi jung ladne se kam nahin tha. Waise to hamne 12th achhe numbers se pass ki thi lekin Riya-Pawan ki prem kahani mein padhai par se dhyaan hat gaya tha sabka aur shayad yahi wajah thi ki numbers man mutabik nahin aaye. Khair Jahan Chah hai Wahan Raah bhi hai. Bas uski ko dhyaan rakhte huye humne college dhoondho abhiyaan jaari rakha.

Kismat hum logon ki achhi thi ki jaldi hi aisa college mil gaya jahan hum teeno aaram se admission le le lekin ek musibat abhi bhi baaki thi aur wo thi Riya ki behan. Numbers kam aane ki wajah se hamein college bahut badhiya nahin mila thi lekin Riya ne jaise taise karke aakhir apne gharwalon aur apni choti behan ko mana hi liya jo is samay 12th mein aayi thi. Ek baar to Pawan mayus hi ho gaya tha ki Riya ka saath kya yahin tak tha lekin bhagwan uspar kuch jyada hi meharban tha. Behan maan gayi to Riya ko apne parents ko manane mein jyada time nahin laga.

College mein hum logon ne admission to le liya lekin ek dar jo har fresher ke dil mein hota hai ragging ka wo hum logon ke dil mein tha. Hum logon ka aaj pehla din tha to jahir hai ragging bhi hogi. Pehle to plan banaya gaya ki do-chaar din baad college jaana shuru karenge lekin kisi se suna tha ki jo jitna late college aana shuru karta hai uski ragging utni hi buri hoti hai. Marta kya na karta wali kahawat hum logon par bilkul theek baithti thi. To hum logon ne socha ki ragging to honi hi hai aaj nahin to do din baad. To aaj hi hone do jo hona hai. Kam se kam aage ke liye to chutkara milega.

Yahi sab soch kar sabne college jaane ka faisla kar liya. Subah 9 baje college shuru hota hai aur hum sab theek 9 baje college pahunch gaye the. Ragging ka dar aur ek college mein aane ki excitement sabke chehre par ek saath dekhi jaa sakti thi. College mein aate hi hum log wahan ka drishya dekhkar hairan ho gaye. Itna bada campus. Bade bade park, bada play ground, canteen wagairah wagairah. Ye sab school mein kahan tha. Bas sab mantramugdh hokar kabhi is taraf to kabhi us taraf dekh rahe the.

Lekin ye khushi jyada der nahin chali kyunki kuch seniors ne hamein charo taraf yun ghoorte dekh liya tha aur samajh gaya tha ki ye freshers hain. Un logon ne hamein apne paas bulaya. Hamari to dar ke maare halat kharab thi ki pata nahin ye log kaisi ragging karenge. Kaun kaun sa tarika apnayenge hamein pareshan karne ke liye. Kahin kisi anjaan ladki ko I LOVE YOU bolne ke liye keh diya aur usne thappad maar diya to sab ke saamne meri ijjat ka kachra ho jayega. kahin apni koi sewa karne ke liye keh diya(Aap log samajh gaye honge ki kaun si sewa) to ye wo log kar nahin payenge.

Khair ye dar un par hawi hota raha aur chalkar apne seniors ke paas pahunch gaye. Hum wahan pahunche to shukar manaun yaa afsos karun ki sabse pehle Ravi ka hi number lag gaya ragging ka. Afsos is baat ka tha ki mera number pehle lag gaya lekin shukar is baat ka tha ki jis senior ne ragging li wo bahut achha ladka tha aur jis tarah ki ragging meri huyi main to bahut khus ho gaya. Senior ne mujhse mera introduction dene ko kaha sabke saamne. Pehle to main kuch ghabraya bolne mein lekin himmat karke apne baare mein jab bolna shuru kiya to senior ko hi kehna pada “Bas bas be, saari ramayan hi sunayega kya, auron ka bhi number aane de”. Ye sunkar main jhenp gaya aur ek taraf khada ho gaya.

Uske baad Riya se poocha ki uski hobbies kya hain to usne singing, dancing, reading books etc. bata di jo uski galti saabit huyi. Senior ne ye suna to keh diya chal dance karke dikha. Ab wo kya kare usne Pawan ki taraf dekha lekin wo bhi lachar tha. Usne ishare se Riya ko aisa karne ke liye keh diya lekin man hi man mein bahut khush tha ki Riya ka dance dekhne ko mila isi bahane. Waise Riya ne achha dance kiya. Dance khatam huya to seniors ne bhi uski tareef ki achhe dance ke liye. Pawan ki halat aur kharab ho gayi ye sochkar ki ab usi ka number hai.

Pawan ke saamne dekhkar senior ne kaha teri hobbies bata to usne soch samajh kar kaha “Reading books, playing cricket, making new friends”. Lekin ragging karne wale koi na koi bahana dhoondh hi lete hain ragging karne ka. To senior ne kaha usse ki saamne jo ladki hai usse 10 min mein dosti karke dikha ki kaise new friends banata hai. Ab Pawan kya bole man maar kar ladki ke paas gaya aur sab kuch saaf saaf bata diya ladki ko. Ladki ko shayad uski halat par taras aa gaya yaa pata nahin kya baat dikhi use Pawan mein ki usne apne baare mein sab kuch bata diya use aur wohi aakar Pawan ne seniors ko bhi bata diya. Senior hairan ho gaya kyunki wo us ladki ko achhe se jaanta tha aur jo Pawan ne use bataya wo ekdum sahi bataya tha. Senior ne Pawan ki tareef karte huye kaha “Yaar tu to sach mein friends bahut jaldi bana leta hai.

 Chal aaj se tum log mere group mein”.

Iske baad senior ne humein apne baare mein ek short description di aur humse dosti kar li kyunki hum logon mein use kuch baat lagi thi. Hum sabne rahat ki saans li ki chalo ye ragging ka jhanjhat khatam huya. Hum to bach gaye lekin abhi bahut se naye ladke the jinke saath ragging ho rahi thi yaa hone wali thi. Tabhi humne dekha ki ek ladka thora ghabraya aur dara sehma sa aa raha hai college mein jise usi senior ne bula liya jisne hamari ragging li thi.

Us ladke ka naam Jay tha jo humein baad mein pata chala.

Jay ek sadharan sa ladka tha. Sannwla rang, aankhon par bada chasma, chehre par masumiyat, lekin man mein atamvishwas, kuch ghabraya sa bhi tha ragging ko lekar jo ki swabhawik tha. Senior ne usse poocha uski hobbies ke baare mein lekin pata nahin wo kuch jawab nahin de paya. Senior ne dubara poocha to usne kaha ki meri koi hobbies nahin hai sirf padhai hi mere jeevan mein sab kuch hai. Hum sab ye sunkar chonk gaye. Ye sahi hai ki padhai hamare jeewan mein bahut jaroori hai lekin khel-khoob, cultural activities, kuch hobbies bhi hamare jeewan mein bahut jyada mayne rakhti hai.

Khel-khood se sharer swasth rehta hai jo ki padhai se aaya tension door karne ke liye ram-baan ilaaj hai. Waise to shakal se hi padhaku ladka lag raha tha lekin apna saara jeewan sirf padhai mein jhonk dena hamein kuch atpata sa laga. Hamein socha jaane iski kaun si majboori hai jo ye khel-khood yaa dusri kisi activities mein dilchaspi nahin leta. Hamne is baare mein usse baat karne ki sochi lekin pehle yahan se to chute. Senior ne kaha ki “To padhai hi tumhare jewan mein sab kuch hai. Chalo main tumhe kuch khel- khood ke gun sikhata hun. Ye kehkar wo hansa aur bola ki is ground ke do chakkar laga kar aao aur wo bhi 10 min mein. Ground koi ¼ kilometer mein faila hua tha yaani use do kilometer daudna tha aur wo bhi non-stop.

Hamein ek baar to ye sochkar bahut khus ho gaye ki kam se kam hum to is cheez se bach gaye lekin agle hi shan hamein uske liye afsos jahir hua. Hamein pata tha ki wo kitna bhi koshish karle 10 minutes mein 2 chakkar nahin laga payega. Uski aankhon mein aansu aa gaye ye sunkar lekin senior par koi fark nahin pada aur usse gusse mein kaha “Chal be jaldi kar, saara din nahin hai mere paas tere liye”. Marta kya na karta usne daud lagani shuru kar di. Sab uski hansi uda rahe the kyunki wo jee jan laga kar daud raha tha lekin fir bhi itni tej nahin tha ki 10 min mein daud poori kar le.

Haanfte haanfte uska dam nikla jaa raha tha, pair jawab de rahe the, aankhon mein se aanshu tapak rahe the, dil bahut joro se dhadak raha tha lekin pata nahin usme himmat kahan se aa rahi thi aur wo daudta hi jaa raha tha aise lagta tha ki jaise wo khud ko koi saja de raha ho. Koi 20 min mein usne daud poori ki. Senior ne usse kahan tune to double time le liya hai, iski penalty tujhe bharni padegi Aaj ka hum sab ka canteen ka bill tujhe bharna padega. Ab ye sunte hi uska rona shuru ho gaya kyunki uske paas paise nahin the. Usne rote rote ye baat batayi to hamein daya aa gayi aur maine kaha senior se ki “Bhai aap please ise chod dijiye, canteen ka bill main de dunga iski taraf se”.

Senior ne mujhe yun ghoor kar dekha jaise maine koi chutkula sunaya ho, lekin use kya farak padta tha. Use bill se matlab tha koi bhi bhare. Hum teeno Jay ko saath lekar senior ke peeche peeche canteen ke liye chal diye.

Shukar hai senior ke saath jyada bande nahin the. Humne kuch khaya, cold drinks pi aur Jay ko bhi jabardasti khilwa diya. Bahut mana kar raha tha shayad sharma raha tha yaa achanak kuch ajnabiyon ke saath yun baithkar unke paison se khana use achha nahin lag raha tha. Lekin hum bhi kam nahin the aur use khila kar hi dam liya. Bill chuka dene ke baad hum wahan se khisak liye ki kahin ab aur koi musibat na aa jaye. Hum log apni class mein pahunch gaye aur sanyog se uski class bhi wohi thi jo Hamari thi. Wahan pahunch kar usne mujhe dhanyawad diya aur kaha bhai main tumhare saare paise thode thode karke chuka dunga. Maine usse kaha ki yaar hum sab dost hai aur doston mein koi udhar nahin hota. Usne hairani se mujhe dekha lekin kuch kaha nahin.

Iske baad hum sabne use apne baare mein bataya aur usne bhi apne baare mein thoda bahut bataya. Kaafi der aise hi khamoshi chayi rahi. Jab wo kuch theek huya to uske baad humne usse poocha uski padhai ki chahat ke baare mein. Pehle to wo chaunk gaya aur kaha ki jaise sabko kuch na kuch pasand hai waise hi use padhna pasand hai. Thoda bahut usne apni family background ke baare mein bataya aur kaha ki mere father ki itni aamdani nahin hai ki wo mujh par jyada paise kharch kar sake. Isliye main dil lagakar padhna chahta hun aur aage badhna chahta hun. Maine kaha wo to sab chahte hain lekin koi bhi iski wajah se apne doosre shauk nahin chod deta. Tum jaroor kuch chupa rahe ho. Please hamein batao agar koi problem hai. Hum use solve karne ki koshish to kar hi sakte hain. Pehle to batane mein wo na-nukur karne laga lekin hum log bhi kahan peecha chodne wale the. Aakhir uspar dawab bana hi dala batane ke liye aur usne batana shuru kiya humein apne baare mein.